PARAFRASEU SAJAK

Harti Parafraseu/parafrasa nyaéta ngarobah wangun karangan atawa nyaritakeun deui eusi karangan kana wangun séjén. Upamana waé, sajak dicaritakeun deui kana wangun basa lancaran (prosa). 

Tujuanna nyaéta supaya leuwih paham kana naon maksud atawa harti anu dikandung tina hiji téks.

Padika nyusun parafraseu:

a.       Maca atawa ngaregepkeun anu maca sajak kalayan gemet;

b.       Catetkeun kekecapan nu dianggap hésé, tuluy paluruh harti jeung sinonimna;

c.       Tuliskeun deui éta sajak make basa sorangan;

d.       Tepikeun hasil parafraseu di hareupeun babaturan

Wanda Parafraseu

1.     Parafraseu Kauger, nyaéta ngarobah sajak kana basa lalancaran (prosa) ku cara nambahan atawa nyelapkeun kekecapan, nepi ka sajak téh kaharti eusi atawa maksudna.

Conto:

SAJAK ASLI

SAJAK DIPARAFRASEU

BANDUNG Karya: Eddy D. Iskandar Mun seug nataan jalan Dipati Ukur Sulanjana Ranggamaléla Wastukancana Siliwangi Pajajaran loba kénéh ngaran-ngaran karuhun nu kalindih ku nu lian  Mun seug nataan papan réklame China Town Pizza Hut Sukiyaki McDonald Kentucky Hoka Hoka Bento Ngaran urang mah nyalingkir Ka pipir-pipir

BANDUNG Karya: Eddy D. Iskandar Mun seug urang rék nataan jalan di Bandung. Bakal manggihan jalan Dipati Ukur, Sulanjana,  Ranggamaléla, Wastukancana, Siliwangi, Pajajaran jeung loba kénéh jalan séjénna Anu make ngaran-ngaran karuhun nu kalindih ku ngaran-ngaran anyar jalan  nu lian Kitu deui mun seug nataan papan réklame, urang bakal nempo atawa maca aya China Town, Pizza Hut, Sukiyaki, McDonald, Kentucky, jeung  Hoka Hoka Bento ngaran-ngaran  réklame anu make basa Sunda atawa make ngaran urang mah nyalingkir ka pipir-pipir, kaéléhkeun ku ngaran tina basa asing.

2.       Parafraseu Bébas, nyaéta ngarobah sajak kana basa lancaran make kekecapan sorangan. Kecap-kecap anu aya dina sajak aslina bisa dipaké bisa henteu.

Conto:

SAJAK ASLI

SAJAK DIPARAFRASEU

BANDUNG Karya: Eddy D. Iskandar Mun seug nataan jalan Dipati Ukur Sulanjana Ranggamaléla Wastukancana Siliwangi Pajajaran loba kénéh ngaran-ngaran karuhun nu kalindih ku nu lian  Mun seug nataan papan réklame China Town Pizza Hut Sukiyaki McDonald Kentucky Hoka Hoka Bento Ngaran urang mah nyalingkir Ka pipir-pipir

BANDUNG Karya: Eddy D. Iskandar Sajak “Bandung” karya Eddy D. Iskandar téh eusina nyaritakeun ngeunaan kaayaan dayeuh Bandung jaman ayeuna. Loba ngaran-ngaran jalan anu make ngaran karuhun Sunda saperti Dipati Ukur, Sulanjana, Ranggamaléla, Wastukancana, Siliwangi, jeung Pajajaran, ayeuna kaéléhkeun pamorna ku ngaran jalan-jalan anyar. Kitu deui, took-toko atawa réstoran anu make ngaran Sunda, ayeuna mah geus kaéléhkeun ku took-toko atawa réstoran anu make ngaran tina basa asing, saperti China Town, Pizza Hut, Sukiyaki, McDonald,  Kentucky, Hoka Hoka Bento.